जलेश्वर । मधेश प्रदेशको महोत्तरी बिहीबार साँझ असाध्यै भारी बन्यो। खेल्ने, कुद्ने र हाँस्ने उमेरका चार बालिकाको पानीमा डुबेर मृत्यु भएपछि दुई गाउँ शोकमा डुबेका छन्। दिउँसोसम्म साथीहरूसँग रमाइरहेका बालबालिकाको साँझ नपर्दै शव घर फर्किएपछि अभिभावकको चिच्याहटले गाउँ नै स्तब्ध बनेको स्थानीयले बताएका छन्।
जिल्ला प्रहरी कार्यालय महोत्तरीका अनुसार मनरासिस्वा नगरपालिका–७ सरपल्लो गाउँमा तीन बालिका र गौशाला नगरपालिका–४ रजखोरमा एक बालिकाको डुबेर मृत्यु भएको हो। सरपल्लो गाउँका वीरेन्द्र भण्डारीकी १२ वर्षीया स्नेहाकुमारी, उनकी छ वर्षीया बहिनी शिवानीकुमारी र अजिज नदाफकी १२ वर्षीया छोरी अफसाना खातुन दिउँसो गाउँ नजिकै रहेको अङ्कुशी र जङ्घा नदीको दोभानमा नुहाउन गएका थिए। स्थानीयका अनुसार गर्मी छल्न नदी पुगेका उनीहरू केहीबेरमै पानीको भुमरीमा परेका थिए।
सँगै गएका बालबालिकाले हारगुहार गरेपछि गाउँले दौडिए पनि उनीहरूलाई जोगाउन सकेनन्। एउटै गाउँका तीन बालिकाको एकैपटक मृत्यु भएपछि सरपल्लो गाउँ शोकमग्न बनेको छ।
यता, रजखोर गाउँमा भने खेल्दै गरेकी दुई वर्षीया दीपिका कुमारी घर नजिकै खेतमा जमेको पानीमा डुबेर मृत अवस्थामा फेला परिन्। प्रहरी निरीक्षक रमेश लामाका अनुसार परिवारले केहीबेर खोजी गरेपछि उनलाई पानीमा डुबेको अवस्थामा भेटिएको थियो।
एकैदिन चार बालिकाको ज्यान गएपछि महोत्तरीका गाउँहरूमा रुवाबासी चलेको छ। स्थानीयवासीले वर्षायाम सुरु भएसँगै नदी, खोल्सा र खेतमा जम्ने पानी बालबालिकाका लागि जोखिमपूर्ण बन्दै गएको भन्दै सतर्कता बढाउन आग्रह गरेका छन्।
प्रहरीले चारै बालिकाको शव परीक्षणका लागि जलेश्वरस्थित प्रादेशिक अस्पताल पठाइएको जनाएको छ। घटनाबारे थप अनुसन्धान भइरहेको जिल्ला प्रहरी कार्यालय महोत्तरीले जनाएको छ।

(तस्विर एआई बाट सांकेतिक रुपमा बनाइएको हो)